تصميم بوستر لقصيدة : اناني

قصيدة : اناني
شعر : طلال حسن التجاني
تصوير : ليال الجرولي
تصميم : متوكل كمال الدين

حكمته عليا بالاعدام بريئ واسم الله ماخاين
وانا الشايلك مواسم ريد وحبك في العيون باين
خلاص سلمت للشيطان ولي وساسو بتعاين
مبارحني وظلمت هواي وانا الاخلصت ليك صاين

انا اتحملت فوق طاقتي وهويت ريدك واحكامو
كتير زودت اهاتي وجرحت هواي واحلامو
بعود من تاني لي دنياك وقدرك ريدي هدامو
خلاص كملت كل جورك حنيني الليله اعدامو

تخيل كيف بكون موجوع برغم حلاوة الايام
بتوه في الحزن وارجع ليك واشيلك تاني لي قدام
وافرح بي هواك وارتاح قبل يتبلا ريقي حرام
تنشف ريدي بالاهات وتكسر قلبي بي الالام

اناني طلعت يا سيدي وبتستكتر علي افراح
تقول مكتوب علي اهواك وانت بتهدي ليا جراح
فترت من الجروح والهم تعبت ونفسي جد ارتاح
واذا كان العذاب ريدك بعيش فوق العذاب مرتاح

تصميم بوستر لقصيدة : الريدة وعد

قصيدة : الريدة وعد
ـــــــــــــــــــــــــــــــــ
شعر : محمد عبدحيم إستيري
ــــــــــــــــــــــــــــــــــــــــــــــ
تصوير : ليال الجزولي
ـــــــــــــــــــــــــــــــــ
تصميم : متوكل كمال الدين
ــــــــــــــــــــــــــــــــــــــــــــ
لما إنت أصلاَ لسواي ما كنت توعدني و ترد
ما عرفتك ما معاي إلا لما بديت تصد
****
سافرت ليك يا سيد هواي لقيت هواك هجر البلد
سكنتو طيفك في دماي بقيت وحيد من غير أحد
لملمت أحزاني و أساي قفلت باب الرجعة جد
أنا و الدموع محروق حشاي ما كنت فاكر الريدة هد
****
أنا و الخيال عاشقين سراب أحلام طويلة ما ليها حد
نتوسد الآلام عذاب فارشين لحاف الفرقة مد
صابرين على مر الشراب شايلين هموم الريدة وعد
سارحين على الموج الرهاب عايشين و ما بالحيلة يد

تصميم بوستر لقصيدة : عايزاك معاى

قصيدة : عايزاك معاى
شعر : عبير زين
تصوير : ليال الجزولي
تصميم : متوكل كمال الدين

عايزة اشوفك كل لحظة تكون قصادي
عايزة احسك فى مشيا وفى قعادي
لما تتحدى المسافات ليا تقطع كل وداي
نسمة بتلطف هجيري ... زهرة بتعطر بوادي
عايزه اشوفك شمس ساطعة نورها ما أتأخر قصادي
عايزة اعيشك حلم صافى وعد ما بخلف ميعادى
عايزة اعيشك حب حقيقي بيهو يتحقق مرادى
عايزة احسك معنى اعمق جوة يتملك فؤادى

تصميم بوستر لقصيدة : ما تزدري

قصيدة : ما تزدري
شعر : محمد عبدالرحيم إستيري
تصميم : متوكل كمال الدين

----------
ما تزدري
كل الحكايـة غــــرام و ريـــد
و كــلام جميل كل يوم بزيد
و سنين هـواك نار تصطلي
قــول لي بـس ليـه تــزدري
ما تزدري
××××
خليك أمين في حبي ليـك
مـا تبقى ظــالـم و مفـتري
ديــمــــة إنـي ولا علـــيـــك
تبيع في الريــدة و تشتري
قانــون هـــواك برجــع إليك
لو طــول حـيــاتــك تــزدري
إنت إزدري
××××
دايــرك تكـون أجمل حبيب
إحـسـاس نبيل زايــد وفـــا
و تـكون كمـان أقــرب قريب
حاضـن هــواي بعد الجــفـا
ألقــاك أمــان ما زول غريب
أجــمـــل صـفـاتـك أوصــفـا
ليه تزدري
××××
ياريـت تحــن لـريــد زمــان
لــمــا البـــداية تقول هــلا
تتـذكـــر البـــوح و المــكان
وكـت الأصيـل و الـدوح خلا
أنا و إنت و الريد و الحــنان
نـتـقـاســــم الأفـــراح حـلا
كيف تزدري
-------------------
إستيري

تصميم بوستر لقصيدة : لأنك فيني

قصيدة : لأنك فيني
شعر : إسراء صديق كشان « روزي بيل »
تصوير : ليال الجزولي
تصميم : متوكل كمال الدين
----------
يامسكون شرايين الغرام والريد
يا حلما بعيـد راجيك
وحاة شوقي المدفق نور على واحة سهول خديك
بريدك يا صباح الخير وأريد نورا بشع في وشيك
جواك يا حبيبي حنين بسوقني علي خطاوي مشيك
بريدك يا نسآيم الليل وقت أشواقي تمشي عليك
تتنزل نجوم في سماك تطوف دارك تحوم حواليك
بشوفك نظره من جواي كأنو اعماقي سكنت فيك
وأقول ياريت يطول الليل وبي قصص الهوى أحجيك
أقول ياريت شمسنا تغيب مدام في النيه تمحي مجيك
لأنك فينـي مزروع ضي كأنها روحي طلعت فيك
أحسك في قليبي حنين بيعكس حبو كلو عليك
أعيش ايامي منك وفيك أعيش الفرحه بين إيديـك
اقيف وسط الخلوق واهتف واقول ياسيدي بفخر بيك

تصميم بوستر لقصيدة : بس ده عيبك

قصيدة : بس ده عيبك
شعر : احمد النعمه الهادي « ودالمناقل »
تصميم : متوكل كمال الدين

----------
بس ده عيبك
انو مابتعرف
عزولك من حبيبك
كنت داير اكون حياتك
كنت داير اكون نصيبك
كنت عارض قلبي عنك
وشاري كنت كمان نصيبك بس
فجأه غيرت اتجاهك
والدروب الكان تجيبك

بس ده عيبك
انو مافكرت مره
لي تقاسمني المحبه
ناوي كنت ادسو حبي
وفي دواخلك استخبه
عيبك انت قسيت وجرتا
بي قلب مسكين لعبته
بعت قلبك لي سوانا
لينا مافضلت حبه

بس ده عيبك
انو كان ريدتنا ليك
غالية زي عينينا واكتر
كنا نهديك امنياتنا
وما اظنو قلبنا قصر
فجأه هان احساس هوانا
والوصول كان ليك تعزر
نحنا ماقصرنا حاشه
بس غرورك انت قرر
بس ده عيبك

تصميم بوستر لقصيدة : ابعـــــــد

قصيدة : ابعـــــــد
شعر : يوسف كمال كاجوري
تصميم : متوكل كمال الدين

عليك الله يا حنين
داريو حنانك ده
وابعد عليك عينيك
انا ما حمل لي ده
كفاي من نارك
واشواق لهيبي فدا
واحسن اموت في الريد
والاخره برضو رضا ...

تصميم بوستر لقصيدة : ضايعه

قصيدة : ضايعه
شعر : يوسف كمال كاجوري
تصميم : متوكل كمال الدين
----------
ضايعه فيني
وساكنه فيني
متين لقاك ؟
ياذوله بتهبش حنيني
وتحتويني
اكيد معاك
مفتاح سروري
الضاوي نوري
نجوم سماك
اقرب من الواقع علي
وفي عيني
تتوه رؤاك
ما لاقي دربك في المشي
ما ضوه قمرك ف العشي
وضاقت سماك
لبست غيوم
ضجت هموم
نزلت هناك
دعاش مطر
ساعة خطر
طيفا هواك
وما قدر يتحسسك
واحزانو كانت ملمسك
قادر يفتش ليك تاني
حقيقه زول ما زول ملاك ......!

تصميم بوستر لقصيدة : انا ما عرفتك

كلمات : Khansaa Alfadil
تصميم : متوكل كمال الدين

----------
انا ما عرفتك هسه
عشان اقعد افاضل بين ...وبين
انا ...عندى احساس انك انت
معاى فى التكوين جنين .....
ما كان مجرد مقترح
فى اللاوجود لقيتنى طين ....
حاساك ...شئ منى انسرق
كل الدلايل كان تقول
زمنك من الزمن انزلق ....
اصبح ملازمنى الارق ....
شخبته بيك كل الورق
كل القصاصات تشبهك .... كل القصاصات
بس بوح قصيدك ...لسه
جواى ما مرق
مع انك الزمن الفرق ......!!!

تصميم بوستر لقصيدة : مقاطع ريد خـرافية

قصيدة : مقاطع ريد خـرافية
شعر : دكتور علي الكوباني
تصوير : ليال الجزولي
تصميم : متوكل كمال الدين

لما الدنيا تقسى عليَ بشيل صورتك واناجيها
الاقي عيونها تبسم ليَ سلام أشواق وحنيه
تتطل الفرحه في عينيَ وتبقي الدنيا عيديه
**** **** ****
وحاتك أسعد اللحظات يوم تلقاكي عينيه
أحس نفسي بين إيديك وأحسك إنتي في إيديا
تعم البهجة في جواي ورود وزهور فرايحيه
**** **** ****
رسمتك في خيالي زمان مقاطع ريد خـرافية
وصوّرتك في رؤى الاحلام أمـيرة الجنة بالفيها
كأنـك إنتـي لا قبلك وبعدك ما في حورية
**** **** ****
بتعجز أروع الابيات وحروف شعري وقوافيها
لو حاولت أوصف ليك مشـاعري الكنت بخفيها
بريـدك ... ما بتكفيها وبحـبك ... ما بتوفّــيها
ولما الدنيا تقسي علي ... بشيل صورتك واناجيها

تصميم بوستر لقصيدة : أعذرينى

قصيدة : أعذرينى
كلمات : التجانى حاج موسى
تصوير : ليال الجزولي
تصميم : متوكل كمال الدين

أعذرينى
لو عيونى ... غصب عنى
وقفو فى عيونك شويه
وسامحينى لو مشاعرى
فاتوا منى وغازولكى بحسن نيه
شايله فى عيونك شقايا
ارحمينى وارتى ليا
عارفه لما تفوتى تمشى تودعينى
تانى ترجع لى سنيني
واصحى تانى
وأبدا من أول اعانى
وابقى مصلوب فى الثوانى
شان تجينى وتنقذينى
يا ملاذى ويا خلاصى ويا يقينى
خلصينى
أصلى غرقان فى الأسيه
وأعذرينى لو عيونى
ارتاحوا فى عيونك شويه .

تصميم بوستر لقصيدة : محزونه

قصيدة : محزونه
شعر : سهي صالح
غناء : عفراء عبدالرضي
لحن : مهند الصاحب
تصوير : ليال الجزولي
تصميم : متوكل كمال الدين


محزونه كيف القي الصبر
والفرحه رحلت من حداي
الضحكه مابان ليها يوم
ماكل يوم بتموت جواي
كل الحنين العندي ليك
معقوله برضو تبيع هواي
انا كنته قايلاك فرحتي
تاريك اصلا ما معاي

كل لحظه وراك حزن
وانا ديما بكتب فيك غناي
وريتني كيف معني الالم
يوم فرقتك كانت اساي
موهوم قليبي الكان زمان
لمن بباري دروب خطاي
تجرحني بالريده وتفوت
وبعدك بفتش في دواي

تصميم بوستر لقصيدة : قلبي العطوف

قصيدة : قلبي العطوف
شعر : عبير زين
تصميم : متوكل كمال الدين

بكره يا قلبى العطــوف .. يامــا فى بعدك تشـــوف
العجـايب والغـرايب .. والمـآسى صنـوف صنوف
الفتور يطوى المشاعر .. وفى سماالأشواق يطوف
وتبقى أيامـك عصيبــة .. وكـُـلْ حياتك تيـه وخوف
والحنان الكان زمـان .. تلقاه مركون فى الـرفوف
والأمان يرحل يغادر .. شايلومن غير رجعة طوف
ولو سألت عن الســـبب .. الاجابه تكــون ظـروف
يا حليلك وانت ســارح .. تقطع أميال بالألــــــوف
ماشى كمِّـــلْـتَّ الفيـــافى .. لا محطــة ولا وقوف
ليل نهار تكتب ترسـل .. لهفة الشوق فى الحروف
ويرجع الرد ليك حسرة .. وما حصد غير العزوف
والظلام إمتـــد حولـك .. يبقى مــن وين الدلوف؟؟
والحبيب الكــان عزيـز .. يبقى ما عاد ليك ولــوف
مـاتت آمالك بِبُعْدُو .. ولى عــزاك رفعــوا الكفوف
والغريبه يقولو عنــك .. قاسى يا قــلبى العطوف!
وإنت وافى وجوة صافى .. نادى زى زهر الجروف
راضى بالهم فى حياتك .. صابره شمسك بالخسوف
أصلو حظك ديمة عاثــــر .. والعوازل بالصفوف
ربى يرحم وليك يطمـن .. ويسعــدك رغم الإنوف

تصميم بوستر لقصيدة : بريدك

قصيدة : بريدك
شعر : مها عبدالمنعم عباس
تصميم : متوكل كمال الدين

عيونا وراك ..تمشي دروب و تتجارا
قلوبنا تتغنى بيك... دقاتها نقارا
وحروفنا هواك ..وريدك انت مسدارا
بريدك
يا مهب الريح... يا شوقا شديد بالحيل
يا نسمة عصاري.. يا قمرا بضوي اليل
يا منبع البسمة .. واحاتنا, عيونك ديل
بيك فرهدت زهور الكون.. يا لمطرنا دليل
بريدك
ياشمس بقت شعاع لخطاوينا
يا الهام خواطرنا ..و يارقصات قوافينا
منوا الغيرك بفرحنا.. ومنوا غيرك ببكينا
يا صباح الخير ... يا خير كل اماسينا
وبريدك
اشيله هواك..مهما بعدت مسافاتنا
بيكفني يا خاطر ..ذكرى همساتنا
ومواعدينا فوق الضلة جلساتنا
منو الغيرنا ,عرف اسرارها ونساتنا
شهد النيل ..بحجيه على الروعة في حكايتنا
بريدك
يا شهيد على القليب مصلوب
يا وشما منحوت جواي مكتوب
حنانك وين زيه ..انا فيه دايب دوب
وانت يا خاطر. .للمحنة دروب
بريدك
بريدك وانت العمر كله
ساعاته ولحظاته ليك طلوا
عويناتنا في محاريبها ليك صلوا
وسهروا وراك أبدا اصله ماملوا
بريدك

تصميم بوستر لقصيدة : ما عافية ليك

قصيدة : ما عافية ليك
شعر : السماني حسن
تصميم : متوكل كمال الدين

ما عافية ليك
ما عافية ليك صبحي ومساي
ما عافية ليك
كل قطرة جاتك
من شرايني ودماي
ما عافية ليك
بي قدر ما نزل المطر
من فوق سحاباتي وسماي
ما عافية ليك
انا كل ثانية تعبت فيك
ماعافية ليك
لبني الزمان
ما عافية ليك
حضن الحنان
ما عافية ليك
سهر اليالي
وحملي بيك كان
سم وماخداو احتقان
واسع بتتندم عليك
وياريتا ما حملت جنين
ندمت بأنها ولدتك

تصميم بوستر لقصيدة : شوق الغريب

قصيدة : شوق الغريب
شعر: ريان عثمان
تصميم : متوكل كمال الدين
ـــــــــــــــــــــــــــــــــــــــــ
الشوق بعيد
اترشا في طرف الدروب
اتسرب الرمله الدقاق
قفل مسامات القلوب
وهط شعورو مع البعيد
حالف علي ايديو يتوب
حاحا الخلوق من سكتو
ردم الحسود وملاهو طوب
لعن البيلعن ريدو ليك
زاد الخصام سواو حروب
قفّل مداخل سكتك
من اي زول ساكت لعوب
طمن عيونك بالغرام
خلا القلب يرقص طروب
وبستحلفك ..
بستحلفك يا ست هواو
لو دايره حس الريد فنون؟
اديهو ريدك من طرف
تلقيهو شايلك في العيون
تلقيهو فارش قلبو ليك
تلقيهو جد اعقل جنون
حتعيشي دنياك بالعرض
اجوط شعور في عز سكون
اديهو شارات الامان
شان ديما ليك يحفظ يصون

تصميم بوستر لقصيدة : أول لمحة ...

قصيدة : أول لمحة ...
ـــــــــــــــــــــــــــــــــ
شعر : عبير زين
ــــــــــــــــــــــــــ
تصميم : متوكل كمال الدين
ــــــــــــــــــــــــــــــــــــــــــ

قدر ما أحاول اتصبر أدارى اللهفة ما تظهر
عيوني الخاينة تخذلنى تجيك فرحانه تتمخطر
تشوفك ماشى فى روعة تمازج هيبة فى المنظر
فى أول لمحة بس تغرق تتوه نشوانة فيك تسكر
أعاتب فيها بى إصرار تسيح من تانى تتقطر
وأقرر إنى أطفى الريد أضارى الشوق يقيد أكتر
أغالب فينى صوت ذكراك أقول أنساك .. و ما أقدر
ولما خلاص يفيض الحال ألاقي عيونى فيك تسهر
و ليها الحق تخاف تحذر تتوه ولهانة فيك أكتر

تصميم بوستر لقصيدة : سكات مؤلم

قصيدة : سكات مؤلم
============
شعر : محمد عبدالرحيم إستيري
==================
تصميم : متوكل كمال الدين
===============
كيف أعيـش انـا بالسكات و أنا من جـوة بـتكلم
بقول فـي كلام محزون و أزيدك يا شقاي الهم
أدوزن فـي الوتر ألحان مناحتي نواح و زايدة ألم
أزرف في دموع الريد دموع ريدي المعاك عدم
أمشي طريقي كلو سدود لا ضلا عليهو أنجم
كيف أنجم و طيفك فات ألحقو وين عشان أسلم
أسلم من جنون محتم أبعد من عذابك كم
أرجع لزماني الراد أقول يا ريت أكون بحلم
أشرب من نبع ريدك أمزجك في الوريد بالدم
أسجنك في القلب دقات أحسك كل ما أتألـم
---------
إستيري

تصميم بوستر لقصيدة : حلمي الدفين

قصيدة : حلمي الدفين
============
شعر : هند محمد
=========
تصميم : متوكل كمال الدين
==============
رافقني البكاء وجالسني الانين
وشوقي الاندفن كان مناه
تكون حنين
انت غراك الزمن ورحته
ياحلمي الدفين
انا في الغرام قاسيت سنين
وحالي العلي اشكيو لمين
خساره تنساها العهود
في لحظه تنسي محبتي
ياربي كيف هانت عليك
عشرتنا خنته مودتي
يحرم علي انا اي ريد
نمن افارق دنيتي
يلا امرق من جواي
فارق زماني واختفي
خساره انو يكون جزاي
تقسي وتبيع قلبي الوفي
حرقت بي صدك حشاي
رويت دموع انا مكتفي

تصميم بوستر لقصيدة : راس السنة

‎ ‎قصيدة : راس السنة
شعر : سهي صالح
تصميم : متوكل كمال الدين

=========
عدت سنه وفات الهنا
ومره الفرح زي طيف بعيد كايس غنا
فارقني فات ابعد سما
توعدني كيف بيوم جديد
تجرحني ليه يازول انا
هل يوم عرفتك تذكرو
ماكان هو يوم راس السنه
وانا لسه فاكره الذكري دي
بس كيف يعيدو ويلمنا
قلبي البحبك ياخ شديد
واه حسرتاه قلبك دنا
وانا والحزن داخل سجن
زي التقول اخوان سوا
محكوم علينا وللابد
اشغالنا شاقه عذاب ضنا
لا يوم مرقتا علي الفرح
لا حسا بي لحظة عنا
قلبي المكلبش بالغرام
وايدي المقيدا حبنا
ماقالو بكره العيد خلاص
نادوهو شريان دمنا
انا عايز اضوق طعم الفرح
وانسي الحكايه المحزنه

تصميم بوستر لقصيدة : انا مابرجع

قصيدة : انا مابرجع
شعر : طلال حسن التجاني
تصميم : متوكل كمال الدين

وانا لسه بعاين ليك بالشوق راجيك تتنازل ولي ترجع

لو باقي علي الريد اليينا بطل تتكابر وتتطنقع
الحب مافيهو كرامة اظن ماتكون فاكر بعدك بوجع
انا صح في غيابك بتالم لكن اندهلك مابنفع
لو ماجابك حبك والريد والشوق في نص ليلك صنقع
معناتا بهون يا غالي عليك والحب الجواي ما بشفع
شكلك لا يوم حبيت عيني لا يوم بالريد همسك سمع
وانا لسه بقول باكر جاي ويمكن باكر اخر مرجع
لو باكر عدي وما طليت يبقي البيناتنا خلاص ودع
خليك في غرورك ياولهان هتموت بالشوق وانا ما برجع

تصميم بوستر لقصيدة : مبروك عليك ريدي

قصيدة : مبروك عليك ريدي
شعر : شذى أحمد عثمان
تصوير : ليال الجزولي
تصميم : متوكل كمال الدين

يامَـليـك الـروح مبـروك عليك ريدي
صَـدقني ياعمري شُـوقي ليك سيدي

شَـــغلت إنــت البـال ضَـويت بُـيوت الريد
شِــــلت كـــل وَجعي وطَــلَ بيــك العــيد

فــيـــني ليك حَــنين زايــــد يانـــور العيـــن
نَــــاري وقـــت البين و نـــاسي إنت تبين؟

بعــد ماضــــاقت الدنيا انــــا لقيتك
بعد مانـــامت الريدة انــا هَـــويـتك

ويــوم مشيت دربك كنـــت جاي علي
اناديك يا (حبي)..؟ أكيـد حتسمح لي

أجــمل ايامي انتا شِــلت قلبي فُــتا
صَحيــــت هَـــواي ياهَــناااي وين كُــنتا

 

تصميم بوستر لقصيدة : عتاب الروح

قصيدة : عتاب الروح
شعر : طلال حسن التجاني
تصميم : متوكل كمال الدين


فراقك قاسي يا روحي وبكت عينيا مشتاقه

غيابك هدا حيل الريد دموع اشواقي رقراقه
وجع فوق العضام بنحر لهيب نيرانو حراقه
بقيت عايش عشم باكر اذا حيين بنتلاقه

وامد حبل العشم يومي واطمن قلبي بالجيه
واناجيو في الليالي واقول محال تنساكا لو حيه
وايقنو تاني بالتحنان واعلقو في حبال نيه
وشكلك ياعزيزة الروح مبارحه وناسيه للجيه

خلاص كمل الصبر ياليل ضلامتك بقت قاسيه
دحين شاعره العلينا هناكا ولا عيونها متناسيه
تكون حاسانا والاشواق ولا خلاص بقت جافيه
وعتابنا الفي الحروف مابهم نعاتب كيف عيون ناسيه

وقت عشرة سنين هانت اكيد مابفيدنا تاني كلام
وشن فايدة عتاب الروح ورامين فوقا لشنو ملام
خلاص ياقلبي اقنع وفوت وانسي هواكا والاحلام
واوعك يوم تقول حبيت عشان الريد علينا حرام

تصميم بوستر لقصيدة : متبري منك يا قلب

قصيدة : متبري منك يا قلب
شعر : محمد عبدالقادر
تصميم : متوكل كمال الدين

ياقلبي اعلن موتك حبه حبه اتجرع الالم بـراك

في الدنيا ما مكتوب فرح استغفر الله خلاص كفاك
اتقطع الحشى والضمير من الجروح دايما شقاك
لكن محال تشفي وتطيب دايما تهاتي علي الوراك
نبكي وننـوح انت وانا تشرب سموم موية قساك
منعول خــلاص انك جواي جارحنـي ديما بي اذاك
مابـــراك درت الالـم انساني يلا و عيش جزاك

بوستر لقصيدة : دمعة اسى

قصيدة : دمعة اسى
شعر : طلال حسن التجاني
تصميم : متوكل كمال الدين

اوجع من الاحساس انك تشوف بالعين
احلام صباك بتضيع وخيانة الغالين
يادنيا ليه الظلم انا ذنبي يعني حنين
حبيت بكل اخلاص في موطن الخاينين

واتجازي قلبي كتير ضايق مرارو هوان
مع انو كان مخلص عايش فدا الحبان
يبكي ويشيل الليل دمعة اسى وتحنان
مسكين قليبي انا في كل ريد بتخان

واصبحت ما فاهم وينو الغلط والصاح
غلطان انا وقلبي ولا احنا مانا نصاح
عايشين زمن غدار الفرحه فيهو نواح
والبسمه فيهو هدوء يسبق ليالي جراح

الله يسامح الناس بقي مافي اي صفاء
وكل القلوب بتموت عطشانه كايسه وفاء
وانا وانت يا قلبي ما قلنا لسه كفا
ومصيرنا يوم حنموت ناقص حزنا جفا

تصميم بوستر لقصيددة : لــــولاك

قصيددة : لــــولاك
شعر : محمد الخير حامد
تصميم : متوكل كمال الدين


لولاك أدري من أكونْ
وما بقلبي من شجونْ..

لولاك أخرجُ عاقلاً
وأعودُ من بابِ الجنونْ

أشدو وأمضي بالهوى
عذْبِ الأماني واللحون
أحيا وأمشي هائماً
متغافلاً .. ماذا يكونْ
لولاك ..لم أصبر عليك
ولا عذابات الجفون!!..

خبأتُ عنك تألُمي
وتوجعي .. وكذا الظنون
خبأت نبض مواجعي
من قبل تحراق العيون

لولاك أدري من أكون
طفلا ً على رحمِ الشجون
ثملاً بعشقك تائها ً
عمري وأيامي تهونْ

 

تصميم بوستر لقصيدة : مشتهيها

قصيدة : مشتهيها

شعر : حمد طمبل حمد الملك

تصميم : متوكل كمال الدين

....

بساهر الليل اناجيها

جفاني النوم عشان احلم  والاقيها

روحي اتعلقت بيها وما قادر ارسيها

... ......

تطير الروح وتعشم في تلاقيها

وترد صادة وتلقى قليبي راجيها

يلاغيها و يوصيها عشان ما تروح

لروح الروح تحكي الشوق وسر البوح

لو كان لسه في باله حنين لي ريد مبكينا ومسهرنا 

.......

غيابك طال نقول نصبر وما قادرين

نشيل الشوق غلبنا حنين

نشيل الليل دموع وانين منو البسمع

منو البطفيها نار الشوق وحبل الوصال مقطوع

..........

اكيد راجع رغم البعد والهجران

اكيد سامع انات عاشقك الولهان

وانا الصابر وما قادر على الحرمان

على الحلم القضينا غنا

على القلب المليتو حنان

ورحت وسبتو بيك هيمان

تصميم بوستر لقصيدة : دايراك انت بس بالذات

شكرا جزيلا للمذيعة اليانع بالسماح لي باخذ هذه الصورة .

واتمني ان ينال هذه التصميم اعجابها .

قصيدة : دايراك انت بس بالذات

شعر : ريان عثمان

تصميم : متوكل كمال الدين

ريدتي ليك وصلت خلااااص حد الممات

جواي حروفك ذابحه صبري وكل يوم بتزيد ثبات

لا قادره افرح بيك معاي لا قادره منك ازيد بعاد

حبك ليا اعماني وريدتك انت ما بتتفات

نبضك انت احياني وصوتك انت زادني سكات

همسك هو الكتل حيلي وشوقي بقربك انت ازداد

منك بسرق الكلمه وبكتب بيها كم ابيات

اشيل من حبك اديكا وكل ما تقل ازيد جرعات

بدونك انت ما ببقي وبدونك بسكن الاهات

بدونك بس جسد ماشي حياتو تتاتي فوق جمرات

وحات حبي ووحات ريدي صفات حبك ازيدا صفات

غيرك انت ما عايزة ودايراك انت بس بالذاااات

اعيش بيكا واموت فيكا واشيلك اجمل اللحظات

الفنان طلال الساته في حفلة بحري الدروشاب الجمعة الموافق ١ يونيو ٢٠١٢ م

حفل بحري الدروشاب الفنان طلال الطاهر « الساته »
تصوير : مهند كمال - ياسر عبدالقادر
فني كمبيوتر : ربيع القوون
اشراف عام : ممدوح كمال
المونتاج والاخراج : متوكل كمال الدين

مع تحيات اسرة فايف ام . دي جي للصورة والصوت

تصميم بوستر لقصيدة : ولايهمك

قصيدة : ولايهمك

شعر : هند محمد الحسن

تصميم : متوكل كمال الدين

يا عيوني ولايهمك افرحي انسيهو همك

ذي مابدل وفاك ماتديهو حنك

صنتي الريد والالفه وخانك الف مره

اهديتو ودادك  جافاك واستمره

فرحتي كتير عيونو وعشتي معاه شجونو

قاسمتيو همومو وزايد في ظنونو

انسيهو النساكي وراح لي زول سواكي

خلاكي محتاره مرافقه انين شقاكي

تصميم بوستر لقصيدة : وصف حسنك

قصيدة : وصف حسنك 

شعر : حمد طمبل حمد الملك

تصميم : متوكل كمال الدين

لا نمة لا شاشاي جراري لا دوباي

اوفوهو لي وصفك حسنك بعرفو براي

إنتي القمر ضواي في المشية ذي نسمة

لاح لي برق تالاك حين فرت البسمة

منك محاسن الكون مردودة منهزمة

يا تحفة فنية يا هالة ضؤية

يا ضحكة الأطفال في أحلى عيدية

ضواية زي الشمس عذ النهارية

يا المن جنان الحور نزلتي للدنيا

بي رغم أني جسور ما كنتي لي منية

فيكي الجمال محصور ما بتشبهك كنية

ما كان قدر حسنك مهما القلم سطر

ولو كان علي قدرك أنا مستحيل أقدر

حاولت في وصفك على قدر ما أقدر 

تصميم بوستر لقصيدة : بتلوميني

قصيدة : بتلوميني 

شعر : محمد عبدالقادر

تصميم : متوكل كمال الدين

تشيلي وترمي فيني الوم تقولي علي انا الغلطان 

وريني كيف اجيك مزلول وانتي خونتي ريدي زمان 

قولت اجيك مـــن الاخـــر ماليك في دواخـــلي مكان 

كنت بحســـب الساعــــات عشان في قربك القي مناي 

روحتي براك دون ميعـــــاد راجعه الليله تبقـــي هنـاي 

وشوفي منو البكون خسران مادام قصدك تكوني شقاي 

لو اشقي العمــر في وراك وحاتك انــت مـــا ندمان 

ولو ريدك يبقي ليا عمر ليك لا بتـــزلا لا بتهـــان 

لانك خونتي عهد الريــد محال يجمعني بيك زمان 

تصميم بوستر لقصيدة : خليك مره حنين

قصيدة : خليك مره حنين 

شعر : يوسف كمال كاجوري 

تصميم : متوكل كمال الدين

ما تبقي قاسي علي ما تبقي والايام 

قاصدين تبكو عيني والجاني من اوجاع 

ظاهر في حالتي البي في الدمعه في الاهات 

صرخه قليب كاويهو كي كل ذنبو يوم رادك شديد 

وين الذنب وانا بيك حي وين العهود الكان ذمان 

لما الغرام لساهو ني وريني بس ايه الحصل 

خلاك تقسي تجور علي خلاك دون اسباب تفوت 

وتسيبني كيف وانا باقي ذي انسان رويحتو الفيهو راحت 

راجيك تعود شان يبقي حي خليك مره حنين 

تصميم بوستر لقصيدة : غاب الحنين

قصيدة : غاب الحنين
 شعر : سوزان احمد
تصميم : متوكل كمال الدين

يسألونــي عن فــراق ٍ صــارَ من دون اختياري
عن حبيب ٍ سكن الروح قديماً ... عن قراري
حين قــررت الرحــيل... دون ادن مــنه او حتي إعــتزار
حين اثرت اللجوء الي كتابي .. وحضن أفـكاري وأشعاري
لم يسالنـي عن غيابي .. عن شُعــوري بإنكسار ِ
عن حنين غاب من شعري .. عن رفيق ٍ مـَل من طول انتظار .
يرقب النجم وحيداً ... يقضي الليل شريدا
يقتل الحـلم جريئاً... من غير إعــتبار
يزرف الدمــعات تكراراً ... يترك الأعين ملـئ باحمرار ِ

تصميم بوستر لقصيدة : إحترت فى الأيام

قصيدة :  إحترت فى الأيام
شعر : عبير زين
تصميم : متوكل كمال الدين

ياما إحترت فى الأيام وحالها الماشى ما وقّّاف
زى ما عشت بيها خريف فيها كمان غشاني جفاف
كتير ضربت عجيب أمثال وعٍبرة تحير الأوصاف
كتير شفت الوجوه ألوان ومن حال البشر أصناف
تعبت وضقت فيها جروح نزفتْ من القلب أضعاف
وشُفت حٌنان وناس طيبين بيوزنو فى الكنوز ألاف
وشفت صغار صبحوا كبار ساوو العُظما فى الأكتاف
.....
وبرضو إحترت فيكا كمان! شايل فى الخِصال أوصاف
غريبة كمان تكون حّساس و فيكا شهامة الأرياف
يا سبحانو من سوالك ومين قال السمع زى شاف؟
رغم اللهفة والأشواق هواك ما زادنى الا عفاف
ياما رسمت فيكا حروف كتاب عنوانو شايلو غلاف
ولما تدور زى الأيام يوم تجفانى دون أنصاف!
بسامح وانسى كل الكان واشيلو هواكا رمش أطراف
دا حال الدنيا ما وقّّاف عادى نعيشها دون ما نخاف
اكيد بلبس بياض أكفان زى ما لبست فيها زفاف

تصميم بوستر لقصيدة : مشغوله بيك

قصيدة : مشغوله بيك 

شعر :  مناهل اسماعيل 

تصميم : متوكل كمال الدين

مشغوله بيك  في كل لحظه و كل آن  

مشغوله بي فرحة مجيك يا ملوون الشوق بالحنان  

مشغوله بالقلب العليك ملهوف و بي ريدك ملان 

مشغوله بي نظرة عنيك وكتين يجود بيها الزمان

بهديك نسيمات الجروف وكتين تهب تملا المكان  

و اهديك فواكه الريد حروف منقه و فراوله و برتكان  

شايلاك مصابيح في الطريق آنوار تبقبق بالأمان  

غيرك و لا بقبل رفيق رغم اللي جاي و القبلو كان  

فرهدت في كوني الورود و فتحت طاقات للحنان 

خليتو كوني علي يجود بي ريدك إنصلح الزمان  

يا آخرة الصبر الجميل يا فرحة الفاز في الرهان  

أنساك .. اسيبك مستحيل انا ذاتي في ذاتك كيان  

تصميم بوستر لقصيدة : اشواقي ليك

قصيدة : اشواقي ليك
 شعر : هند محمد الحسن
تصميم : متوكل كمال الدين


انا كيف كذابه كيف وانت شايف بي عينيك
اصلي ماحبيت سواك وقلبي عايش بين ايديك
كل لحظه بعيده منك بتحكي قصة شوقي ليك

لو بتعرف حالي بعدك طول الليالي بكاء وسهاد
وايامي صبحت بي وراك حزينه كاسيها السواد
احساس دفنتو بعد مشيك قلق منامي وتاني عاد

وريني كيف اقدر اخون وانا قلبي اهداك الامان
واشواقي هدها الحنين صبرت ليك كل السنين

تصميم بوستر لقصيدة : رحيلك

قصيدة : رحيلك

شعر : هند محمد الحسن

تصميم : متوكل كمال

من دون ميعاد اعلنت رحيلك فارقت اشواقي الفيها مقيلك

ناسي الكان بي حبو اسيرك كتر خيرك كمل سيرك

ياريت في هجرك تلقي احلامك تلاقي حبيب تديهو غرامك

تشوف الدنيا معاه سعيده وبي الافراح تزهر ايامك

يارب تتوفق في خطواتك تلقي مرادك وتلقي هناك

لو ختيت تسال عن حالنا برضو معاك كايسين لي رضاك

تصميم بوستر لقصيدة : ليكا عندي جميل

قصيدة : ليكا عندي جميل
 شعر : شذى احمد عثمان
تصميم : متوكل كمال الدين

فاكر يوم لـقانا زمان يوم شلتني في روحك
وسموك بي هيمان عيشتني فـ قـلبـك وريتني أحلى حنان
وفاكر كلامك لي ...؟ يوم قلت لي رِدتك .. وقليبي أمنتك
يوم علمتني الضحكة مـن قلبي تطـلع كيف نسيت الدنيا فـ لحظة
وشتاي اصبح صيـف ياحني بـس قول لي ليه ده كلو يقيف
كُـنتـا وين .. وقت إحتجـتا ليك جـنبي ..؟
وليـه نِـسيت .. لحظات صـفاك قُـربي ..؟
قـول لي إيـه الغــيرك؟ .. قول لي ماتخبي .. شان غلطة ضقنا الويل
وبقينا بعاد .. بعاد بالحيل وعفواً على الذكري ... بس ليكا عندي جميل

تصميم بوستر لقصيدة : دموعك

قصيدة : دموعك

شعر : حمد طمبل حمد الملك

تصوير : ليال الجزولي 

تصميم : متوكل كمال

يومي المسحت دموعك حسيت بأنك أسيري

خايف أقسى عليك ويمسح دموعك غيري

وتكون تحت تأثيرو ... وأنا السبب يا سميري

خايف مشيك للغير يصبح سبب تدميري

مهما عملت معاي بعزيه لي تقصيري

كوني اقس عليك محال يكون تفكيري

ولو بدت ليك قسوة اعزيها لي تعبيري

انا لو غلطت معاك أرجوك قبول تبريري

اكيد هو ما قصدي ولا البكون في ضميري

اشكيني لي زاتي وهي بتنصفك يا اميري

تصميم بوستر لقصيدة : انت وانا

قصيدة : انت وانا

شعر : الريان عبدالقادر النعيم

تصميم : متوكل كمال الدين

انت وانا

ساقيين سحاب القول ولف وغمامو ظلل حولنا

عازفين قصايد الحب نشيد ايقاعو دوزن رقصنا

ماشين على دروب الحنين نتخطا حاجز صدنا

شايلين وهج غط القمر تتشابا لينا السوسنا

نايرين نشابه قوس قزح فتح مواسم عمرنا

دايسين على الحزن الصعيب والفرحه تحقن دمنا

سايبين مرافئ الفرقه ديك قالدين ملامح حبنا

دافقين مشاعر الجفوه جد والريد بينبت عندنا

صابرين علي شفق انتظار والشوق يجينا يطلنا

صادحين بنضحك زي كنار والصوت يوضح اننا

ناسجين حلم لي بكره جاي غاياتو بس انت وانا

تصميم بوستر لقصيدة : بشرى ساره

قصيدة : بشرى ساره

شعر : محمد سليمان

تصميم : متوكل كمال الدين

بشرى ساره...

جيتك الليله بجديدي واحلى ايامي ونهارا...

جيت ومادد ليكي ايدي ننفض السما من غبارا...

لا انتظار يطرانا تاني ولا نعيش ذي الحيارى...

وبشرى ساره...

النجيمات فيكي محنن... وديمه بيساءلن..خبارا...؟

وكل جناين الوادي دبلن ولا المطر ذي طبعو زارا

فضلو مستنين ربيعك... ويا ربيع طال انتظارا...

وبشرى ساره...

القليب فاض بي لهيبو وروحي ليل ونهار في نارا...

وإنتي لو ما حاسه بيا... وريدتي ماهاميك ودارا

حمشي ابعد عن طريقك شان بخاف تصلك شراره

وبشرى ساره...

أخدي من زمنك دقيقه أصلي جاييك بي بشاره

كل تفاصيلي بتريدك... ريد ولا عرفو العذارى...

كوني عايش ليك...حقيقه 

وبيكي بشراي ديمه ساره...

وبشرى ساره...

تصميم بوستر لقصيدة : جاي راجع

قصيدة : جاي راجع

كلمات : هند محمد الحسن

تصميم : متوكل كمال

جاي راجع ليا تاني تنسي غدرك في ثواني

ناسي كم قلبك شقاني ومن شراب المر سقاني

لما ماتزكرت مره عرفت عرفت انك زول اناني

نسيت هواك زي مانساني حطمت وجدو الفيهو باني

جاي راجع شنو الي جابك يلا ارحل ماحبابك

مااصلي بدري قفلتو بابك مالي بيك وبي عزابك

اصلي مافكرت ارجع لو بكت ادمع سحابك

تصميم بوستر لقصيدة : فرح الأحبة

قصيدة :  فرح الأحبة

شعر : حمد طمبل حمد الملك

تصوير : ليال الجزولي

تصميم : متوكل كمال الدين

خيبة رجاي وانا يا مناي الزفة جيتك احضره

رغم الوجع والإنكسار قررت احضر اخره

شايفك هناك بين النجوم و الحفلة انت منوره

شاورت ليك انا من بعيد جيتي شان ما تنكره

انا اصلي قاعد بي هناك مع ناس تهاني و ميسرة

كنت لابس زي ملاك و الطلة حور في كوثره

اما الرقيص بس يا جميل سفينة في الموج مبحرة

توزع البسمات درر و الخلوق دي مكسرة

شايف كمان الناس تشابي ما الصورة بالجد مبهرة

شايف الأمات هناك بغنو سمحة المقدرة

مقدرتي خانتني و بقيت بدل النجم في الجمهر

تصميم بوستر لقصيدة : بداية ريد

قصيدة : بداية ريد

شعر : يوسف كمال كاجوري 

تصميم : متوكل كمال

من اول بدايه الريد دقيت فيك انت الباب

وما استنيت كتير واقف لقيتك قولت لي حباب

تعال ادخل مكانك ده مكان من دونك انت يباب

مكان راجيك انت وبس بعد الثانيه فيك حساب

عشان توصل دياري هنا وكل البي بفيض ترحاب

تعال ادخل قليب مفتوح قلب حباك دون اسباب

عشق عينيك قبل الشوف درس حرفك قراهو كتاب

حفظ اوتار حنانك جد امان صدقك عليهو ثياب

وفي الاخر بعد جيتك بعد ما فراقنا عده وغاب

كفانا خلاص تعال ادخل وما تنسي وراك سد الباب

تصميم بوستر لقصيدة : حبيب الروح

قصيدة : حبيب الروح
شعر :  امنه الطيب الحاج
تصميم : متوكل كمال الدين

الومك ياحبيب الروح ولا علي  روحتك اتحسر
اعاتب في زمن ظالم ول ااقول فراقنا قدر
ياما الدنيا ظلمتني ومعاك كنت بتصبر
حلمت معاك ب اجمل ريد وكان انا حلمي بيك بكبر

كتمت هواك في جواي وشلتك في عيوني امل
فارشه قلبي ليك ورود يعطر وعدك الصندل
كتبت عمري بي اسمك وماقايله الفراق بحصل
كنت حكيت ثواني الشوق عشان في حسنك اتامل

تصميم بوستر لقصيدة : ناسي غرامك

قصيدة : ناسي غرامك
شعر : هند محمدالحسن
تصميم : متوكل كمال الدين

ياما خلفت وعود ريدتنا ليك غفرنا وقلنا سماح
وهبته العمر الراح في حبك عشت سنينو انين ونواح

الاحلام الشايله صباها لاقادره تعيش لا لاقيه مناها
حليله اماني الروح ياحليله كانت راسمه معاك هناها
شايله خصالك جافيه منامك دوام بي الصد ممتده سماها

الظاهر انك ناسي غرامك حليل الزكري الفيها هيامك
اريتك ترجع توفي عهودك وتاني تعود اجمل ايامك

تصميم بوستر لقصيدة : الوداع

قصيدة : الوداع
شعر : حمد طمبل حمد الملك
تصميم : متوكل كمال الدين

حاولت تتجمل و ساعة الفراق مرة
توعدني بي أيام ما جاية بالمرة
قلبك إختار حبو و سكوني كان بره
و ان شاء الله تتهنى و تنساني بالمرة
ساعدني بس أنساك وما ترجع الكرة
ياسيدي امشي خلاص ما الرابط انحله
اصلا قدرنا فراق انسى الحصل يلا
يا حبيب كفاية سهاد عد النجوم ولى
شيل زكرتك ودع اصلا نهايتو ضياع
البينا مهما كان لازم نهايتو وداع
ليه انا بس اساهر الليل وأزرف الدماع
مادام نسيت انت وفشلت في الإقناع

تصميم بوستر لقصيدة : هالكني جورا

قصيدة : هالكني جورا

شعر : طلال حسن التجاني

تصميم : متوكل كمال

لما جيت وفتحت صفحه وداير اكتب عن نفورا

وداير اكتب عن شقايا وعن فراقا وعن نحورا

وعن سهاد في الليل غشاني وعن غرق في نص بحورا

وقبل اكتب حرف حتي لقيت دموعي ملت سطورا

قلت افتح صفحه تاني واحكي فيها علي غرورا

وعن جماله وعن عيونا وعن نعيما وعن حبورا

ومالقيت في بالي حرفاً بوصف التيه البزورا

وبالدلال مخلوقه روحها ومن عبير الخد عطورا

بانه بتميل في خميلي وبالصدود هالكني جورا

وبالنفور ضايع شبابي ولسه محتار كيف بدورا

وتايهه في دنيا السعاده وياما هجري بزيد سرورا

وسافرت خلتني اشكي وابكي في المحراب ازورا